2018-ലെ കേരളത്തെ പിടിച്ചുകുലുക്കിയ മഹാപ്രളയം ഒരു പ്രകൃതിദുരന്തമായിരുന്നില്ല, മറിച്ച് മനുഷ്യനിർമിതമായിരുന്നു എന്ന ആരോപണത്തിൽ സർക്കാർ നടപടിയിലേക്ക്. മുൻ വൈദ്യുതി വകുപ്പ് മന്ത്രി കെ. കൃഷ്ണൻകുട്ടിയുടേതെന്ന പേരിൽ പുറത്തുവന്ന വിവാദ ശബ്ദസന്ദേശത്തെക്കുറിച്ച് സമഗ്രമായ ക്രൈംബ്രാഞ്ച് അന്വേഷണം നടത്താൻ ആഭ്യന്തരമന്ത്രി രമേശ് ചെന്നിത്തല ഉത്തരവിട്ടു. പ്രളയത്തിന് പിന്നിൽ ക്രിമിനൽ ഗൂഢാലോചനയുണ്ടെന്ന ഗുരുതരമായ വെളിപ്പെടുത്തലുകൾ ശബ്ദരേഖയിലുണ്ടെന്ന പരാതിയെ തുടർന്നാണ് ഈ നടപടി.

നിയമസഭാ തെരഞ്ഞെടുപ്പിന് തൊട്ടുമുമ്പ് എം.എൽ.എ മാത്യു കുഴൽനാടനാണ് ഈ ഓഡിയോ ക്ലിപ്പ് പുറത്തുവിട്ടത്. മഹാപ്രളയം സംഭവിക്കാൻ കാരണം കൃത്യമായ ആസൂത്രണത്തോടെയുള്ള മനുഷ്യ ഇടപെടലുകളാണെന്നും ഇതിന് പിന്നിൽ വലിയൊരു ഗൂഢാലോചന നടന്നിട്ടുണ്ടെന്നും ശബ്ദസന്ദേശത്തിൽ ആരോപിക്കുന്നു.മുൻ മന്ത്രിയുടേതെന്ന് കരുതപ്പെടുന്ന ഈ ഓഡിയോ ടേപ്പ് പുറത്തുവന്നതോടെ വലിയ രാഷ്ട്രീയ വിവാദങ്ങൾക്കാണ് തുടക്കമായത്. സംഭവത്തിന്റെ സത്യാവസ്ഥ പുറത്തുകൊണ്ടുവരണമെന്ന് ആവശ്യപ്പെട്ട് ലഭിച്ച പരാതിയുടെ അടിസ്ഥാനത്തിലാണ് സർക്കാർ ഇപ്പോൾ അന്വേഷണം പ്രഖ്യാപിച്ചിരിക്കുന്നത്.

പ്രളയത്തിന്റെ യഥാർത്ഥ കാരണങ്ങൾ കണ്ടെത്താനും ഇതിൽ എന്തെങ്കിലും തരത്തിലുള്ള അട്ടിമറികൾ നടന്നിട്ടുണ്ടോ എന്ന് പരിശോധിക്കാനുമാണ് ക്രൈംബ്രാഞ്ച് അന്വേഷണം ലക്ഷ്യമിടുന്നത്. സാധാരണക്കാരന്റെ ജീവിതത്തെ കീഴ്മേൽ മറിച്ച ആ ദുരന്തം കേവലം അനാസ്ഥയായിരുന്നോ അതോ ആസൂത്രിതമായ ഗൂഢാലോചനയുടെ ഭാഗമായിരുന്നോ എന്ന ചോദ്യത്തിനാണ് ഇപ്പോൾ ഉത്തരം തേടുന്നത്. ഓഡിയോ ടേപ്പിന്റെ ആധികാരികത പരിശോധിക്കുന്നതടക്കമുള്ള നടപടികൾ ക്രൈംബ്രാഞ്ച് വേഗത്തിലാക്കും