നവംബർ മാസം പ്രമേഹ ബോധവൽക്കരണ മാസമാണ്; നവംബർ 14 ലോക പ്രമേഹ ദിനമായി ആചരിക്കുന്നു. ലോകമെമ്പാടും ഏകദേശം 58.9 കോടി മുതിർന്നവർ പ്രമേഹബാധിതരാണ് — അതായത്, ഒമ്പത് മുതിർന്നവരിൽ ഒരാൾ. ഇതിൽ നല്ലൊരു പങ്ക് പേർക്കും തങ്ങൾക്ക് രോഗമുണ്ടെന്ന് പോലും അറിയില്ല. കാരണം, തുടക്കത്തിൽ പ്രമേഹം പലപ്പോഴും ലക്ഷണങ്ങളൊന്നും കാണിക്കാറില്ല. അതുകൊണ്ടാണ് "നേരത്തേ തിരിച്ചറിയുക" എന്നത് ഇത്ര പ്രധാനമാകുന്നത്.

എന്താണ് പ്രമേഹം?
നാം കഴിക്കുന്ന ഭക്ഷണത്തിൽ നിന്നുള്ള ഗ്ലൂക്കോസ് (പഞ്ചസാര) ശരീരകോശങ്ങളിലേക്ക് എത്തിച്ച് ഊർജ്ജമാക്കാൻ സഹായിക്കുന്ന ഹോർമോണാണ് ഇൻസുലിൻ. പാൻക്രിയാസ് ഗ്രന്ഥിയാണ് ഇൻസുലിൻ ഉൽപാദിപ്പിക്കുന്നത്. ഇൻസുലിൻ വേണ്ടത്ര ലഭിക്കാതിരിക്കുകയോ, ശരീരത്തിന് അത് ശരിയായി ഉപയോഗിക്കാൻ കഴിയാതിരിക്കുകയോ ചെയ്യുമ്പോൾ രക്തത്തിൽ പഞ്ചസാര കൂടുന്നു — ഇതാണ് പ്രമേഹം.

പ്രമേഹത്തിന് വ്യത്യസ്ത തരങ്ങളുണ്ട്.

ടൈപ്പ് 1 പ്രമേഹം: ശരീരത്തിന്റെ പ്രതിരോധസംവിധാനം തന്നെ ഇൻസുലിൻ ഉൽപാദിപ്പിക്കുന്ന കോശങ്ങളെ ആക്രമിക്കുന്നു. സാധാരണയായി കുട്ടികളിലും ചെറുപ്പക്കാരിലുമാണ് കണ്ടുവരുന്നത്; ഇവർക്ക് ഇൻസുലിൻ ചികിത്സ അനിവാര്യമാണ്.

ടൈപ്പ് 2 പ്രമേഹം: ഏറ്റവും സാധാരണമായ ഇനം. ശരീരം ഇൻസുലിനെ പ്രതിരോധിക്കുന്നതാണ് കാരണം. ജീവിതശൈലിയുമായി അടുത്ത ബന്ധമുള്ള ഇത് നേരത്തേ തിരിച്ചറിഞ്ഞാൽ നന്നായി നിയന്ത്രിക്കാനും, ചിലപ്പോൾ പൂർണ്ണമായും പിന്നോട്ട് മാറ്റാനും കഴിയും.

ഗർഭകാല പ്രമേഹം: ഗർഭിണികളിൽ കാണുന്ന ഇത് പ്രസവശേഷം സാധാരണയായി മാറും; എന്നാൽ പിന്നീട് ടൈപ്പ് 2 പ്രമേഹം വരാനുള്ള സാധ്യത ഇവരിൽ കൂടുതലാണ്.

ശ്രദ്ധിക്കേണ്ട ലക്ഷണങ്ങൾ
ഇടയ്ക്കിടെ മൂത്രമൊഴിക്കൽ, അമിതമായ ദാഹം, എപ്പോഴും വിശപ്പ്, കാരണമില്ലാത്ത ഭാരക്കുറവ്, അമിത ക്ഷീണം, മുറിവുകൾ ഉണങ്ങാൻ താമസം, കൈകാലുകളിൽ തരിപ്പും മരവിപ്പും, കാഴ്ച മങ്ങൽ, ഇടയ്ക്കിടെ ഉണ്ടാകുന്ന അണുബാധകൾ — ഇവയിലേതെങ്കിലും ഉണ്ടെങ്കിൽ വൈകാതെ പരിശോധിക്കുക. എന്നാൽ ഓർക്കുക: ടൈപ്പ് 2 പ്രമേഹമുള്ള പലർക്കും വർഷങ്ങളോളം ലക്ഷണങ്ങളൊന്നും ഉണ്ടാകണമെന്നില്ല. അതിനാൽ ലക്ഷണങ്ങൾക്കായി കാത്തിരിക്കരുത്; പരിശോധനയാണ് വഴി.

ആർക്കാണ് കൂടുതൽ സാധ്യത?
മാതാപിതാക്കൾക്കോ സഹോദരങ്ങൾക്കോ പ്രമേഹമുള്ളവർ, അമിതഭാരമുള്ളവർ, 35 വയസ്സിനു മുകളിലുള്ളവർ, വ്യായാമം കുറവുള്ളവർ, ഗർഭകാലത്ത് പ്രമേഹം ഉണ്ടായിരുന്ന സ്ത്രീകൾ, രക്തസമ്മർദ്ദവും കൊളസ്ട്രോളും കൂടുതലുള്ളവർ — ഇവരൊക്കെ കൂടുതൽ ശ്രദ്ധിക്കണം.

പരിശോധന ലളിതമാണ്
HbA1c എന്ന രക്തപരിശോധന കഴിഞ്ഞ മൂന്ന് മാസത്തെ ശരാശരി പഞ്ചസാര നില കാണിക്കുന്നു:

HbA1c 5.7 ശതമാനത്തിൽ താഴെ — സാധാരണം

HbA1c 5.7 മുതൽ
6.4 ശതമാനം വരെ — പ്രീഡയബറ്റിസ് (രോഗം വരാനുള്ള മുന്നറിയിപ്പ് ഘട്ടം)

HbA1c 6.5 ശതമാനമോ അതിൽ കൂടുതലോ — പ്രമേഹം

എട്ട് മണിക്കൂർ ആഹാരം കഴിക്കാതെ,
അതായത് എട്ട് മണിക്കൂർ ഉപവസിച്ച് (ഫാസ്റ്റിംഗ്) നടത്തുന്ന പരിശോധനയിൽ
100–125 — 
പ്രീഡയബറ്റിസ്

അതേ ഫാസ്റ്റിംഗ് പരിശോധനയിൽ
126-ന് മുകളിൽ — പ്രമേഹം

35 വയസ്സ് കഴിഞ്ഞവരും മുകളിൽ പറഞ്ഞ അപകടഘടകങ്ങൾ ഉള്ളവരും വർഷത്തിലൊരിക്കലെങ്കിലും പരിശോധന നടത്തുക
എന്തുകൊണ്ട് നേരത്തേ തിരിച്ചറിയണം?
നിയന്ത്രണമില്ലാത്ത പ്രമേഹം ഹൃദയം, വൃക്കകൾ, കണ്ണുകൾ, നാഡികൾ, പാദങ്ങൾ എന്നിവയെ സാവധാനം തകർക്കും — ഹൃദയാഘാതം, പക്ഷാഘാതം, വൃക്ക തകരാറ്, കാഴ്ച നഷ്ടം, കാൽ മുറിച്ചുമാറ്റൽ എന്നിവ വരെ ഇത് നയിച്ചേക്കാം. എന്നാൽ നേരത്തേയുള്ള ചികിത്സയും ജീവിതശൈലി മാറ്റങ്ങളും ഈ സങ്കീർണതകളെ വലിയ അളവിൽ തടയാൻ കഴിയും.

നിയന്ത്രണത്തിന്റെ അഞ്ച് തൂണുകൾ
1. ഭക്ഷണം: പ്ലേറ്റിന്റെ പകുതി പച്ചക്കറികൾ, കാൽ ഭാഗം പ്രോട്ടീൻ (മീൻ, മുട്ട, പയർവർഗ്ഗങ്ങൾ), കാൽ ഭാഗം ധാന്യം അല്ലെങ്കിൽ ചോറ് — ഈ രീതി ശീലിക്കുക. മധുരപാനീയങ്ങളും അമിതമായ മധുരവും ഒഴിവാക്കുക, ചോറിന്റെ അളവ് കുറയ്ക്കുക.

2. വ്യായാമം: ദിവസവും 30 മിനിറ്റ് വേഗത്തിലുള്ള നടത്തം; ആഴ്ചയിൽ കുറഞ്ഞത് 150 മിനിറ്റ്. ശരീരഭാരം 5–7 ശതമാനം കുറയ്ക്കുന്നത് തന്നെ പ്രീഡയബറ്റിസ് രോഗമായി മാറാനുള്ള സാധ്യത പകുതിയിലധികം കുറയ്ക്കുമെന്ന് പഠനങ്ങൾ കാണിക്കുന്നു.

3. മരുന്ന്: ഡോക്ടർ നിർദ്ദേശിച്ച മരുന്നോ ഇൻസുലിനോ കൃത്യമായി കഴിക്കുക; സ്വയം നിർത്തുകയോ അളവ് മാറ്റുകയോ ചെയ്യരുത്.

4. നിരീക്ഷണം: നിർദ്ദേശപ്രകാരം വീട്ടിൽ പഞ്ചസാര പരിശോധിക്കുക, 3–6 മാസത്തിലൊരിക്കൽ HbA1c നടത്തുക, വർഷത്തിലൊരിക്കൽ കണ്ണ്, വൃക്ക, പാദ പരിശോധനകൾ മുടക്കരുത്.

5. പാദ സംരക്ഷണം: ദിവസവും കാലുകൾ പരിശോധിക്കുക; ചെറിയ മുറിവ് പോലും അവഗണിക്കരുത്.

അവസാന വാക്ക്
പ്രമേഹം ഒരു ജീവിതകാല ശിക്ഷയല്ല. നേരത്തേ തിരിച്ചറിച്ച്, ചെറിയ മാറ്റങ്ങളോടെ, നന്നായി നിയന്ത്രിച്ച് സുഖമായി ജീവിക്കാം. ഈ പ്രമേഹ ബോധവൽക്കരണ മാസത്തിൽ തന്നെ ഒരു പഞ്ചസാര പരിശോധന നടത്തുക — നിങ്ങൾക്കും, നിങ്ങൾ സ്നേഹിക്കുന്നവർക്കും വേണ്ടി.

Sheeba Mathai, APRN, FNP-BC

CareOne Medical Clinic, ഫ്രിസ്കോ, ടെക്സസ്